Portugaliýanyň Licores do Vale brendi «L» we «V» harplary bolan logotipini hasaba aldyrmak meselesinde Louis Vuitton bilen bolan kazyýet dawasynda ýeňiş gazandy.
Fransiýanyň meşhur kompaniýasy Monsan şäherçesinden bolan bu maşgala brendini özüniň firma stilini göçürmekde aýyplady we Louis Vuitton moda öýüniň logotipine gaty meňzeşdigini öňe sürüp, LV — Licores do Vale haryt nyşanynyň hasaba alynmagyna garşy çykdy.
Bir ýyldan gowrak dowam eden bu kazyýet işinde fransuz ägirdi portugal brendini «brendiň abraýyndan mugthor gurçuk ýaly peýdalanmakda» we «adalatsyz bäsdeşlikde» aýyplady.
Kazyýet dawasy logotipiň awtory Andre Ferreýra garşy gozgaldy. Onuň aýtmagyna görä, bu logotip aýaly Tanýa Afonso bilen bilelikde ýerli gönümel söwdalarda satýan şireli içgileri, mürepbeleri, ballary we kökeleri üçin döredilipdir.
Ilki Portugaliýanyň Milli senagat eýeçiligi instituty brendi hasaba almagy makullapdy, emma Louis Vuitton kazyýet arkaly bu amaly wagtlaýyn togtadypdy. Netijede, kazyýet portugal kompaniýasynyň tarapyny tutdy.
Kazyýet kararyndan soň Licores do Vale wekilleri sosial torlarynda: «L we V harplary hemmelere degişlidir!» diýen ýazgy galdyrdylar we özlerini goldanlara minnetdarlyk bildirdiler.
