Özbegistanyň Ylymlar akademiýasynyň ýanyndaky Teýmirleriň taryhynyň döwlet muzeýiniň we Türkmenistanyň Döwlet medeniýet merkeziniň Döwlet muzeýiniň wekilleriniň arasynda “Teýmirler döwrüniň keramatly zatlaryny we arhitektura ýadygärliklerini öwrenmek we dikeltmek” mowzugy boýunça wideokonferensiýa geçirildi. Bu barada “Dunýo” habarlar agentligi habar berýär.
Wideokonferensiýa Türkmenistanyň Prezidentiniň 2021-nji ýylyň 4-5-nji oktýabrynda Özbegistana eden resmi saparynyň dowamynda gazanylan ylalaşyklary durmuşa geçirmegiň çäginde guraldy. Konferensiýada Teýmirler döwrüniň keramatly zatlaryny we arhitektura ýadygärliklerini öwrenmek we dikeltmek boýunça hyzmatdaşlygyň perspektiwalary ara alnyp maslahatlaşyldy.
Munda Özbegistanyň we Türkmenistanyň muzeý çärelerine özara gatnaşmak, dürli bilelikdäki sergileri guramak we ylmy tejribeler bilen paýlaşmak meselelerine aýratyn üns berildi.
Bu çäräniň ahyrynda Özbegistanyň Teýmirleriň taryhynyň döwlet muzeýi bilen Türkmenistanyň Döwlet medeniýet merkeziniň Döwlet muzeýi hyzmatdaşlyk ähtnamasyna gol çekmäge taýýarlyk görmek barada ylalaşdylar.
