Ýaponiýanyň Toshiba elektrotehniki korporasiýasy öň yglan edilen meýilnama garamazdan, üç däl-de iki kompaniýa bölünmekçi bolýar. Bu öňki programmadan nägile bolan käbir paýdarlaryň islegleri bilen baglanyşykly diýip, Kyodo habarlar agentligi habar berýär. Muny TASS ýetirýär.
Geçen ýylyň noýabr aýynda Toshiba 2023-nji maliýe ýylynda (2023-nji ýylyň 1-nji aprelinde başlaýar) üç aýratyn kompaniýa bölünmekçidigini aýtdy. Olaryň biri ýarym geçirijiler we beýleki elektron bölekler, ikinjisi, esasanam, elektrik stansiýalary üçin agyr senagat enjamy bilen meşgullanar, üçünjisi bolsa tutuş toparyň emlägini dolandyrar diýlip çaklanylýardy. Indi ykdysady we has netijeli menejment bähbidine ikinji we üçünji kompaniýalary birleşdirmek kararyna gelindi.
“Nikkei” gazetiniň maglumatlaryna görä, bölmek meýilnamalary Toshiba-nyň ýolbaşçylygynyň dürli girdeji çeşmeleri we ösüş strategiýalary bolan kompaniýalary döretmek arkaly ähli toparyň kapitallaşdyrmasyny artdyrmak islegi bilen baglanyşyklydyr.
Soňky ýyllarda korporasiýa, hususan-da 2015-nji ýylda maliýe hasabatynyň galplaşdyrylmagy sebäpli dörän dawa we 2017-nji ýylda amerikan bölümçesiniň batmagy sebäpli çekilen ýitgiler bilen baglanyşykly çökgünligi başdan geçirýär. Şeýle-de, Toshiba-ny ýolbaşçylygy bilen birnäçe esasy paýdarlaryň arasyndaky gapma-garşylyk hem kyn ýagdaýa saldy.
