Ýiten sungat predmetlerini gözlemek bilen meşgullanýan gollandiýaly detektiw Artur Brand ýarym asyr mundan öň ogurlanan gymmatly gadymy rim bürünç heýkelini Fransiýa gaýtaryp berdi. Brand müşderileriniň biriniň kanuny taýdan satyn alan kiçijik Bahus heýkeliniň gelip çykyşyny anyklamagy haýyş edende, onuň yzyny tapandygyny aýtdy. Bu barada Euronews-e salgylanyp, Day.Az habar berýär.
“Men bürünç heýkeliň hiç ýerde hasaba alynmandygyny anykladym. Şonda men 1927-nji ýylyň suratly gadymy katalogyny tapdym. Onda heýkeliň 1894-nji ýylda Fransiýada geçirilen arheologik gazuw-agtaryş işlerinde tapylandygy, soňra onuň muzeýe berlendigi aýdylýar. Soňra men şeýle pikirlendim: eger onuň ýeri muzeýde bolsa, onda bu gün nädip bu ýerde bolup bilýär?”.
40 santimetrlik Bahus 1973-nji ýylyň ahyrynda Şatiýon kommunasynyň muzeýinden ogurlandy, jenaýatçylar ony penjireden çykaryp alyp gitdiler. Indi bolsa heýkel ekspozisiýadaky ýerine gaýdyp geler.
Bu babatda muzeýiň müdiri Katrin Molle öz begenjini gizlemeýär: “Bu örän möhüm sungat predmeti, bular ýaly heýkelleriň sany gaty az, üstesine-de bu örän ýokary derejede ýerine ýetirilen”.
Bürünç Bahusyň gaýtarylmagy üçin çykdajylary iki britan hususy kolleksioneri we Şatiýonyň şäher administrasiýasy öz aralarynda paýlaşdylar.
