Hindistanyň Merkezi banky 1-nji aprelde başlajak 2022-2023-nji maliýe ýylynda sanly rupiýa çykarar. Bu barada Hindistanyň Maliýe ministrliginiň beýannamasyna salgylanyp, CNBC habar berýär. Muny epravda.com.ua ýetirýär.
Ol ýerde sanly rupiýanyň ornaşdyrylmagynyň “blokçeýni we beýleki tehnologiýalary ulanmak arkaly” işlenip düzüljekdigi bellenilýär.
“Şeýlelik bilen, Hindistan eger sanly ýuany synagdan geçirýän Hytaýyň yzyna eýerip, öz meýilnamalaryna berk ýapyşsa, onda sanly bankyň sanly walýutasyny (CBDC) girizen dünýäniň ilkinji uly ykdysadyýetleriniň birine öwrüler” – diýip, CNBC ýazýar.
CBDC (Central Bank Digital Currency) Merkezi bank tarapyndan çykarylýan puluň sanly görnüşidir.
“Merkezi bankyň sanly walýutasynyň ornaşdyrylmagy sanly ykdysadyýete uly itergi berer” – diýip, Hindistanyň maliýe ministri Nirmala Sitharaman ýurduň ýyllyk býujetini hödürlemek bilen aýtdy.
“Şeýle-de, sanly walýuta walýutany dolandyrmagyň has netijeli we has arzan ulgamyna getirer” – diýip, ol sözüniň üstüni ýetirdi.
Ministr sanly rupiýanyň nähili işlejekdigi ýa-da onuň nähili görnüşde boljakdygy barada jikme-jik maglumat bermedi, ýöne onuň “blokçeýn we beýleki tehnologiýalary ulanmak arkaly” hödürlenjekdigini aýtdy.
