Täjigistan suwuklandyrylan gazy import edýän ýurtlarynyň sanawyny giňeltmegi göz öňünde tutýar. Ozal bu sanawda Russiýa we Gazagystan esasy orunda durýan bolsa, gazanylan ylalaşyga laýyklykda, indi bu ýurda Türkmenistandan hem suwuklandyrylan gazyň iberilişi artdyrylar. Bu barada Täjigistanyň enegetika we suw serişdeleri ministri Daler Jumanyň sözlerine salgylanyp, tj.sputniknews saýty habar berýär.
Indi Täjigistana Türkmenistandan gaz has köp geler. Ýakynda bu iki ýurduň arasynda Täjigistana suwuklandyrylan gazy çäklendirilmedik möçberde ibermäge mümkinçilik berjek ylalaşyk baglaşyldy diýip, Daler Juma aýdýar. Onuň sözlerine görä, täjik tarapy Türkmenistandan eýýäm 2021-nji ýylda 5 müň tonna suwuklandyrylan gazy satyn aldy.
Ýeri gelende bellesek, geçen ýylyň awgustynda Aşgabatda Türkmenistanyň Prezidenti Gurbanguly Berdimuhamedow bilen Täjigistanyň Prezidenti Emomali Rahmonyň arasynda geçirilen gepleşikleriň jemleri boýunça gol çekilen resminamalaryň hatarynda suwuklandyrylan gazy we ýanyjy çalgy ýaglaryny ibermek ulgamynda hyzmatdaşlyk hakynda ylalaşyk hem bar.
Suwuklandyrylan gaz täjigistanly sürüjiler üçin ýangyjyň iň islegli görnüşleriniň biridir. Ýurtda awtoulaglaryň 50 — 60 göterimi şu ýag bilen doldurylýar.
