Serjo Mattarella respublikanyň parlamentiniň iki palatasynyň bilelikdäki mejlisinde geçirilen ses berişligiň sekizinji tapgyrynda Italiýanyň prezidenti saýlandy. Netijeler aşaky palatanyň başlygy Roberto Fiko tarapyndan mälim edildi. Bu barada TASS habar berýär.
Prezident saýlanmak üçin absolýut köplügi (50%-den gowrak), ýagny 505 ses almak ýeterlikdi. Özüniň ilkinji ýedi ýyllyk mandatyny tamamlaýan Mattarella üçin parlament agzalarynyň we sebit wekilleriniň hataryndan saýlawa gatnaşyjylaryň 759-sy ses berdi.
Palermodan bolan Serjo Mattarella 1980-nji ýyllarda Hristian-demokratik partiýasynyň hatarynda işjeň syýasy karýerasyna başlady. 1983-nji ýylda Serjo Mattarella ilkinji gezek parlamente saýlandy, 1987-nji ýylda ilkinji gezek Hristian demokratlarynyň hökümetine goşuldy, 1989-njy ýylda bolsa bilim ministriniň wezipesini eýeläp, Julio Andreottiniň kabinetine girdi. Mattarella öz hormatyna “mattarellum” diýlip atlandyrylan saýlaw kanunçylygynyň esasy awtorlarynyň biri boldy.
Mattarella 2011-nji ýylda Konstitusion kazyýetiň kazysy saýlanýar. 2015-nji ýylda bolsa Italiýanyň 12-nji prezidenti bolýar.
