Ýapon awtokonserni Toyota 2021-nji ýylyň jemi boýunça satuwynyň 10,5 mln awtomobil bolandygyny habar berdi. Şeýlelik bilen, kompaniýa awtoulag satuwy boýunça dünýäde birinji ornuny saklady, ikinji orunda 8,9 mln awtomobil bilen Volkswagen ýerleşdi. Bu barada kommersant.ru habar berýär.
Toyota-nyň ýyllyk hasabatynda “geçen ýyl COVID-19 pandemiýasynyň ýaramaz täsiriniň 2020-nji ýyla garanyňda pes bolandygy” aýdylýar. Netijede, Toyota Motor modelleriniň global satuwy 10,5 mln bolup, bu 2020-nji ýyl bilen deňeşdirilende 10,1% köpdür. Toyota-nyň Ýaponiýada satuwy 2,1 mln, Ýaponiýanyň daşynda 8,4 mln awtomobil boldy. Kompaniýanyň umumy önümçilik göwrümi 10 mln awtomobil bolup, bu bir ýyl ozalkydan 9,4% köpdür.
2021-nji ýylda global satuwyň möçberi boýunça bu kompaniýa diňe Volkswagen bäsdeşlik edip bilýärdi. Ýöne Volkswagen-iň iki hepde mundan öňki hasabatyndan soň munuň üçin mümkinçilik örän azdy: çip ýetmezçiligi bilen bagly dowam edýän kynçylyklar sebäpli Volkswagen-iň global satuwy soňky on ýylda iň pes görkezijä gelip, 8,9 mln awtomobile deň boldy.
2021-nji ýylda dünýäde awtomobil satuwy boýunça üçünji orny Renault-Nissan-Mitsubishi bileleşigi eýeledi – 7,8 mln awtomobil.
2008-nji ýylda Toyota 70 ýyl töweregi birinji orny eýeläp gelýän General Motors konsernini gysyp çykaryp, ilkinji gezek satuw boýunça dünýäde iň uly awtoöndüriji boldy. 2008-nji ýyldan 2018-nji ýyl aralygynda Toyota birinji orny eýeledi, diňe 2011-nji ýylda bu orny GM-e berdi. 2018-nji ýylyň jemi boýunça dünýäde iň uly awtokonsern Volkswagen boldy.
