27-nji ýanwarda Hazar deňzindäki «Dostluk» ýatagynyň uglewodorod serişdelerini bilelikde gözlemek, işläp geçmek we özleşdirmek hakynda Türkmenistanyň Hökümeti bilen Azerbaýjan Respublikasynyň Hökümetiniň arasyndaky Ylalaşygyň taslamasyny işläp taýýarlamak we ylalaşmak boýunça bilelikdäki Iş toparynyň dördünji mejlisi geçirildi. Oňa toparyň türkmen we azerbaýjan taraplarynyň agzalary gatnaşdylar.
Mejlisiň barşynda iş toparynyň bilelikdäki başlyklary çykyş etdiler, bilermenler toparlarynyň ýolbaşçylarynyň degişli maglumatlary diňlenildi, şeýle-de bilelikdäki Iş toparynyň dördünji mejlisiniň Teswirnamasynyň taslamasy ara alnyp maslahatlaşyldy.
Ara alyp maslahatlaşmalaryň barşynda taraplar bilelikdäki ylalaşygyň degişli goşundylarynyň tiz wagtda ylalaşylmagy babatda özara düşünişdiler. Bilermenler toparyna geljekki potratçy-maýadaryň gyzyklanmalaryna dahylly bolan degişli resminamalaryň taslamalarynyň taýýarlanylmagy hem-de ylalaşylmagy bilen bagly bolan hereketleriň işjeňleşdirilmegi tabşyryldy. Duşuşygyň jemleri boýunça Teswirnama gol çekildi.
