Saud Arabystanynda koronawirus pandemiýasy barada ýalan maglumatlaryň ýaýradylandygy üçin 266,5 müň dollara çenli möçberde pul jerimesi salnar we bäş ýyla çenli möhlet bilen azatlykdan mahrum ediler. Bu barada patyşalygyň IIM habar berdi. Muny TASS-a salgylanyp, Day.Az ýetirýär.
“Kimde-kim sosial ulgamlar arkaly koronawirus pandemiýasy bilen bagly ýalan maglumatlary ýaýratsa, ýa-da şeýle maglumatlary beýlekilere iberse, şeýle-de howsala döredip biljek galp maglumatlary neşir etse ýa-da patyşalygyň ýaşaýjylaryny degişli sanitariýa çärelerini bozmaga çagyrsa ýa-ha 100 müňden 1 mln riala çenli möçberde (26,6 müň dollardan 266,5 müň dollara çenli) jerime görnüşinde, ýa-da bir ýyldan bäş ýyla çenli möhlet bilen azatlykdan mahrum etmek görnüşinde, ýa-da bir wagtyň özünde bu iki jeza çäresi görnüşinde jezalandyrylar” – diýlip, edaranyň Twitter sahypasynda ýerleşdirilen beýannamada aýdylýar. Onda gaýtadan düzgün bozulan halatynda jezanyň iki esse artdyryljakdygy bellenilýär.
Soňky maglumatlar boýunça, ilatynyň sany 34,2 mln bolan Saud Arabystanynda pandemiýa başlany bäri 638 327 kesel hadysasy hasaba alyndy, 584 050 adam sagaldy, 8 914 adam keseliň netijesinde ýogaldy. Patyşalygyň ilaty koronawirusa garşy 54 596 890 derman dozasyny aldy.
