Halkara zähmet guramasy (HZG, BMG-niň ýöriteleşdirilen edarasy) 2022-nji ýylda dünýäde işsizleriň sanynyň 207 milliona barabar boljakdygyny çaklaýar, bu 2019-njy ýyl bilen deňeşdirilende 21 mln köpdür. Bu barada guramanyň Ženewada neşir edilen hasabatynda aýdylýar diýip, TASS habar berýär.
“Global işsizlik, iň azyndan 2023-nji ýyla çenli COVID-19 pandemiýasyndan öňki görkezijilerden ýokary derejede saklanar. 2022-nji ýylda onuň derejesi, hasaplamalara görä, 207 million bolar, 2019-njy ýylda bu 186 milliondy” – diýip, dokladyň awtorlary bellediler.
HZG-niň 2022-nji ýylda zähmet bazarynyň dikelişi bilen bagly çaklamany peseldendigi nygtalýar.
“HZG iň soňky ykdysady ösüş çaklamalaryna esaslanyp, 2022-nji ýylda işlenjek umumy sagat sanynyň pandemiýadan öňki derejeden tas 2% pes bolmagyna garaşýar” – diýlip, dokladda aýdylýar. Iýun aýynda HZG 2022-nji ýylda bu görkezijiniň azyndan 1%-e çenli peseljekdigini çaklapdy.
Hünärmenleriň aýtmagyna görä, pandemiýa sebäpli ýüze çykan çökgünlik dürli “işçiler toparlaryna we ýurtlara” birmeňzeş täsirini ýetirmedi, bu hem ýurtlaryň içindäki we olaryň arasyndaky deňsizligi güýçlendirýär we ähli döwletleriň diýen ýaly ykdysady, maliýe we sosial binýadyny gowşadýar.
Çökgünlik erkekleriňkä garanyňda, aýallaryň işine has güýçli täsir etdi we onuň netijeleri ýakyn ýyllarda duýular diýip, HZG belleýär. Öz gezeginde, bilim we hünär taýýarlygy edaralarynyň ýapylmagy ýaşlar üçin uzak möhletleýin täsirini ýetirer.
“Iki ýyl çökgünlikden soň çaklama gowşak, dikeldişe tarap ýol bolsa haýal we durnuksyz bolup galýar” – diýip, HZG-niň baş müdiri Gaý Raýder belledi. Onuň aýtmagyna görä, zähmet bazaryndaky ýagdaýy gowulaşdyrmazdan, dünýä ykdysadyýetiniň hakyky dikelişi bolup bilmez.
