Halkara futbol federasiýasy (FIFA) Germaniýanyň «Bawariýa» toparynyň polşaly hüjümçisi Robert Lewandowskini 2021-nji ýylyň iň gowy oýunçysy diýip ykrar etdi. Baýrak gowşurylyş dabarasy guramanyň Sýurihdäki ştab-kwartirasynda bolup, onlaýn görnüşde geçirildi. Bu barada TASS habar berýär.
Bu baýraga «Pari Sen-Žermeniň» argentinaly hüjümçisi Lionel Messi we Angliýanyň «Liwerpul» toparynyň müsürli hüjümçisi Mohammed Salah hem dalaş etdi. Lewandowski bu baýragy ikinji gezek aldy. Öň, Messi «Altyn top» üçin ses berişlikde polşaly hüjümçiden öňe geçipdi.
FIFA görä ýylyň iň gowy oýunçysy üçin baýragyň eýesi žurnalistleriň, baş tälimçileriň, erkekleriň we zenanlaryň milli ýygyndylarynyň kapitanlarynyň halkara birleşiginiň ses bermegi arkaly kesgitlenýär.
Lewandowski 33 ýaşynda, şu möwsümde hüjümçi «Bawariýa» üçin 27 oýunda 34 gol geçirdi. 2021-nji ýylda Lewandowski 41 gol geçirip, bir möwsümdäki gollarynyň sany boýunça Gerd Mýullere degişli bolan Germaniýanyň çempionatynyň rekordyny täzeledi. Onuň geçiren gollary «Bawariýanyň» öňki hüjümçisiniňkiden bir gol köp boldy. 2020/21-möwsüminiň jemi boýunça Lewandowski milli ýewropa ligalarynyň iň gowy bombardiri bolup, «Altyn butsyny» aldy, Germaniýanyň çempionatyny we Super kubogyny utdy. Ol Polşanyň milli ýygyndysynyň düzüminde Ýewropa çempionatyna gatnaşdy, ýöne topar toparçadan çykyp bilmedi.
