«Geçen 2021-nji ýylda harby we hukuk goraýjy edaralarda meýilnamalaýyn esasda işler alnyp baryldy, emma muňa garamazdan, geçen ýylda bu edaralaryň işlerinde birnäçe kemçiliklere ýol berildi. Olar barada Döwlet howpsuzlyk geňeşiniň mejlislerinde degişli ýolbaşçylara bellikler edildi we olary gysga wagtyň içinde düzetmek barada anyk tabşyryklar berildi. Kemçiliklere ýol beren adamlara bolsa kanun esasynda çäreler görüldi» diýip, Döwlet howpsuzlyk geňeşiniň giňişleýin mejlisinde türkmen Lideri anyk mysallara ýüzlendi.
Mysal üçin, geçen ýylda Goranmak ministrliginde näsazlyk sebäpli harby awtoulag ýol-ulag hadysasyna sezewar bolup, harby gullukçylaryň birnäçesiniň aradan çykmagyna we hassahana düşmegine ýol berildi.
«Şular ýaly gödek düzgün bozulmalar näme sebäpden ýüze çykýar, elbetde, serkerdäniň jogapkärçilik duýgusynyň pesdiginden ýa-da gulluk borjuna çynlakaý garamaýandygy sebäpli ýüze çykýar. Şoňa görä-de, birinjiden, harby-düzgün nyzamy has-da berkidip, ministrligiň ähli ýolbaşçylarynyň we serkerdeleriniň harby gulluga jogapkärçiligini ýokarlandyrmaly, ikinjiden, harby bölümleriň ähli tehnikalarynyň abatlyk ýagdaýyna seljerme geçirmeli, näsaz harby tehnikalary abatlamaly we hemişe söweşjeň, gurat ýagdaýda saklamaly, üçünjiden, harby tehnikalary, ok-ýaraglary saklanýan angarlary we ammarlary hemişe bildirilýän talaplara laýyklykda abat ýagdaýda saklamaly we ulanmaly, şeýle-de olaryň goragyny ýokary derejede alyp barmaly, harby bölümlerde düzgün-nyzamy pugta berjaý edip, düzgün bozulmalaryň öňüni almak, esasan-da, adamyň jan saglygy bilen bagly düzgün bozulmalara ýol bermezlik üçin ähli zerur çäreleri görmeli» diýip, döwlet Baştutany goranmak ministri B.Gündogdyýewe anyk tabşyryklary berdi.
