Dünýä ykdysadyýetiniň ösüş depgini geçen ýyl dikeldişden soň pandemiýa, inflýasiýanyň çaltlaşmagy we karzlaryň ýokary derejesi netijesinde 2023-nji ýylyň ahyryna çenli haýallanar. Şeýle çaklamalar Bütindünýä bankynyň ýanwar aýyndaky “Dünýä ykdysadyýetiniň geljegi” hasabatynda saklanýar diýip, TASS habar berýär.
“2021-nji ýyldaky güýçli ýokary galyşdan soň dünýä ykdysadyýeti COVID-19-yň nobatdaky ştammlarynyň ýaýrama howplary, şeýle-de inflýasiýanyň, karzyň we girdeji deňsizliginiň ýokarlanmagy sebäpli haýallanma döwrüne gadam basýar, bu hem bazar emele gelýän ýurtlarda we ösýän ýurtlarda dikelişi howp astyna goýup biler” – diýip, hasabatyň awtorlary hasaplaýarlar.
Olaryň çaklamalary boýunça, dünýä ykdysadyýetiniň ösüş depgini ep-esli haýallanar – 2021-nji ýyldaky 5,5%-den 2022-nji ýylda 4,1%-e we 2023-nji ýylda 3,2%-e çenli.
“Omikron-ştammynyň çalt ýaýramagy pandemiýanyň ykdysady işjeňlige ýetirýän ýaramaz täsiriniň ýakyn wagtda bes etmejekdigini görkezýär. Mundan başga-da, uly ýurtlarda, şol sanda Birleşen Ştatlarda we Hytaýda ykdysady ösüş depgininiň ep-esli haýallanmagy bazar emele gelýän ýurtlarda we ösýän ýurtlarda daşarky islege ýaramaz täsir eder” – diýip, Bütindünýä banky belleýär.
Hünärmenler, bir tarapdan, ösen ýurtlaryň we beýleki tarapdan, bazar emele gelýän ýurtlaryň we ösýän ýurtlaryň arasyndaky ykdysady ösüş depginleriniň barha artýan deňsizligine ünsi çekýärler. Ykdysady taýdan ösen ýurtlarda ösüş depginleriniň 2021-nji ýyldaky 5%-den 2022-nji ýylda 3,8%-e we 2023-nji ýylda 2,3%-e çenli haýallanmagyna garaşylýar. Bazar emele gelýän ýurtlarda we ösýän ýurtlarda ykdysady ösüş depgini 2021-nji ýyldaky 6,3%-den 2022-nji ýylda 4,6%-e we 2023-nji ýylda 4,4%-e çenli peseler. “2023-nji ýyla çenli ähli ösen ýurtlarda önümçiligiň göwrümi doly dikeler, bazar emele gelýän ýurtlarda we ösýän ýurtlarda ol pandemiýadan öňki derejesinden 4% pes bolar” – diýlip, hasabatda aýdylýar.
