Türkmenistan we Eýran Yslam Respublikasy Eýranyň üsti bilen «swop» görnüşde Azerbaýjana iberilýän türkmen tebigy gazynyň möçberini ýylda 15 milliard kub metre çenli artdyrmagy meýilleşdirýär. Bu meselä Türkmenistanyň Hökümet wekiliýetiniň Eýrana gulluk iş saparynyň çäklerinde geçirilen ikitaraplaýyn eneregetika ugurly gepleşikleriň dowamynda garaldy. Bu barada Eýranyň nebit ministri Jawad Owjiniň sözlerine salgylanyp, «Trend» agentligi habar berýär.
Jawad Owji bu barada aýdyp, ýurtlaryň arasynda ýakyn günlerde energetika ulgamynda hyzmatdaşlyk barada resminamalar toplumyna gol çekiljekdigini mälim etdi.
TmCars.info-nyň ozal habar berşi ýaly, geçen ýylyň 28-nji noýabrynda Aşgabatda geçirilen Ykdysady Hyzmatdaşlyk Guramasynyň 15-nji sammitiniň çäklerinde Eýranyň, Azerbaýjanyň we Türkmenistanyň arasynda tebigy gaz alyş-çalşygy hakynda üçtaraplaýyn ylalaşyk gazanyldy. Bu babatda Eýranyň hem-de Azerbaýjanyň arasynda degişli şertnama gol çekildi. Şonuň esasynda 2022-nji ýylyň 1-nji ýanwaryndan türkmen tebigy gazy «swop» görnüşde Azerbaýjana iberilip başlandy.
