8-nji ýanwardan Rumyniýada mata örtükleriniň dakylmagyna gadaganlyk güýje girýär we düzgüni bozanlara 2,5 müň Rumyniýa leýasyna çenli möçberde ($574,37) jerime salnar. Bu barada Içeri işler ministri Luçian Bode Digi24 teleýaýlymyna beren interwýusynda aýtdy. Muny rbc.ru ýetirýär.
Adatdan daşary ýagdaýlar boýunça milli komitetiň kararyna laýyklykda, Rumyniýanyň ýaşaýjylary jemgyýetçilik ýerlerine diňe burnuny we agzyny doly ýapýan FFP2 gorag derejeli lukmançylyk örtüklerinde we respiratorlarda baryp bilerler.
Bu düzgün bäş ýaşa çenli çagalara, otagda ýeke bolan adamlara, 3 m aralygy berjaý eden ýagdaýynda telealypbaryjylara we olaryň myhmanlaryna degişli bolmaz. Sosial araçäk saklanan halatynda ybadat wagtynda, köpçüligiň öňünde çykyş edilende we sport bilen meşgullanylanda “dogry” örtükleri dakynmaga mejbur edilmez.
Bodeniň aýtmagyna görä, örtükleri saýlamaga degişli çäklendirmeler çenden çykma hasaplanmaýar. Bu “omikronyň” çalt ýaýraýanlygy sebäpli zerurdyr. Örtükler bilen bagly kanunyň berjaý edilmegine polisiýa işgärleri we žandarmlar gözegçilik eder.
Soňky bir günüň dowamynda Rumyniýada 6036 adam koronawirus bilen keselledi, bu ondan öňki günden 114 hadysa köpdür diýlip, ýurduň COVID-19 bilen bagly portalynyň maglumatlarynda bellenilýär. Olardan 521 adam 180 günüň dowamynda ikinji gezek keselledi. Pandemiýa başlany bäri ýurtda 1,83 milliondan gowrak koronawirus hadysasy ýüze çykaryldy.
