Ýaponiýanyň Sony korporasiýasy elektromobilleri işläp taýýarlamak bilen meşgullanjak täze bölümçesini döretmegi meýilleşdirýändigini aýtdy. Bu barada kompaniýanyň ýaýradylan habarynda aýdylýar diýip, TASS habar berýär.
Munuň üçin ýazda aýratyn Sony Mobility firmasy esaslandyrylar. Netijede, Sony elektromobil bazaryna çykmagy göz öňünde tutýar, ýöne anyk möhlet heniz bellenilmedi.
Özi üçin täze ugurda brend döretmek boýunça meýilnamalarynyň çäginde Sony Las-Wegasda geçirilýän sarp ediş elektronikasynyň, robototehnikanyň we mobil tehnologiýalarynyň Halkara sergisinde özüniň işläp taýýarlan ýolsuz ýerden ýöremäge ukyply awtoulagynyň prototipini hem görkezdi.
Ýapon awtoöndürijileri soňky döwürde zyňyndylary nola deň bolan tehnologiýalary ösdürmäge uly üns berýärler. Öň Toyota 2030-njy ýyla çenli Ýewropada diňe elektrik we gibrid hereketlendirijili awtoulaglary satmagy maksat edindi. Kompaniýa Hytaýda şeýle görkezijilere 2035-nji ýyla çenli ýetmek isleýär.
