OPEK ýurtlarynyň ministrleri duşenbe güni geçirilen ýörite wideokonferensiýada Kuweýtden Haýsam al-Gaýsy 2022-nji ýylyň awgust aýyndan OPEK-iň Baş sekretary wezipesine bellediler. Bu barada TASS-a OPEK-däki çeşme habar berdi, soňra sekretariat hem resmi metbugat relizini neşir edip tassyklady.
Al-Gaýs bu wezipede 2016-njy ýyldan bäri işleýän nigeriýaly Muhammed Barkindonyň ornuny çalşyrar. Onuň ygtyýarlyk möhleti 2022-nji ýylyň iýul aýynda tamamlanýar. Al-Gaýs OPEK-de Kuweýtiň wekiliýetine 2017-nji ýyldan 2021-nji ýyl aralygynda ýolbaşçylyk etdi. Onuň kandidaturasy sanawda ýeke-täkdi. Metbugat relizinde bellenilişi ýaly, al-Gaýs 2022-nji ýylyň 1-nji awgustyndan Baş sekretar wezipesine girişer.
OPEK-iň düzgünnamasyna laýyklykda, Baş sekretar üç ýyl möhlet bilen saýlanylýar we diňe bir gezek gaýtadan saýlanyp bilner.
Umuman alanyňda, Barkindony hasaba almazdan, OPEK-de 1961-nji ýyldan bäri 22 Baş sekretar we konferensiýanyň OPEK-iň işine gözegçilik edýän bäş sany prezidenti boldy.
Haýsam al-Gaýsyň nebit kompaniýalarynda, şeýle-de Kuweýtiň DIM-inde iş tejribesi bar. Ol 1990-njy ýylda “politologiýa” hünäri boýunça Kaliforniýadaky San-Fransisko uniwersitetini tamamlady. Al-Gaýs alty dilde, şol sanda arap, iňlis, nemes, portugal, ispan, fransuz dillerinde erkin gürläp bilýär, ol hytaý dilinde hem gürleýär.
