Ýaponiýanyň Premýer-ministri Fumio Kisida 2022-nji ýyl üçin ýurduň esasy maksadyny mälim etdi. Bu barada TASS agentligi habar berýär.
Kisidanyň sözlerine görä, onuň geçen ýylyň oktýabrynda häkimiýete gelen Hökümetiniň esasy maksady koronawirusa garşy göreşmek bolup durýar. Ol COVID-19-a garşy sanjymlaryň güýçli depgini netijesinde Ýaponiýada epidemiologik ýagdaýyň birneme köşeşendigini belledi, muňa garamazdan, ýurt koronawirusyň omikron ştammynyň howpy bilen ýüzbe-ýüz bolýar.
Premýer-ministr ýurduň Hökümetiniň mundan beýläk-de koronawirusa garşy göreşmek boýunça çärelere hem-de ykdysadyýeti dikeltmäge ilkinji orunda üns berjekdigini nygtady.
Ýeri gelende bellesek, geçen ýylyň noýabrynda Kisida dünýäde koronawirusyň omikron ştammynyň ýaýrandygy sebäpli, ýurduň öz serhetlerini ýapýandygyny habar beripdi. Bu çäklendirme 30-njy noýabrdan başlap herekete girizildi we ol daşary ýurtly raýatlaryň ählisine degişlidir.
