Gazagystanyň Senaty ölüm jezasy görnüşindäki jezany Jenaýat kodeksinden aýyrýan kanuny kabul etdi. Bu barada ýurduň parlamentiniň ýokarky palatasynyň saýtynda aýdylýar diýip, www.ekhokavkaza.com habar berýär.
Kanunlara üýtgeşmeler girizilenden soň, ähli iş kesilenler üçin ölüm jezasy ömürlik tussag bilen çalşylar.
Ölüm jezasy görnüşindäki jeza Gazagystanyň Jenaýat kodeksiniň 17 maddasynda göz öňünde tutulýardy. Hususan-da, şeýle jeza terrorçylyk we uruş döwründe edilen agyr jenaýatlar, şeýle-de ýurduň prezidentiniň janyna we ilkinji döwlet baştutany Nursultan Nazarbaýewiň janyna kast edilendigi üçin berlip bilinýärdi.
Ýöne 2003-nji ýyldan bäri ýurtda ölüm jezasyna moratoriýa hereket edýärdi. Bu kazyýetler tarapyndan ölüm jezasynyň berlendigini, ýöne onuň diňe moratoriýanyň ýatyrylan halatynda ýerine ýetirilip bilinjekdigini aňladýar.
Gazagystanyň prezidenti Kasym-Žomart Tokaýew şeýle jeza çäresini gadagan edýän kanuna heniz ýanwar aýynda gol çekdi. Şeýlelikde, ýurt parahatçylyk döwründe ýurtda ölüm jezasynyň ulanylmagyny gadagan edýän halkara şertnamany tassyklady.
