Täjigistanyň prezidenti Emomali Rahmon parlamentde eden çykyşynda ýurtda sosial tölegleriň artdyryljakdygyny aýtdy. Ol 2022-nji ýylyň ortalarynda Täjigistanda aýlyk haklarynyň, pensiýalaryň we talyp haklarynyň ýokarlanjakdygyny habar berdi diýip, tj.sputniknews.ru belleýär.
“2022-nji ýylyň 1-nji iýulyndan döwlet we jemgyýetçilik dolandyryş edaralarynyň, bilim, medeniýet, sport, saglygy goraýyş, sosial gorag we beýleki býujet guramalarynyň ähli işgärleriniň aýlyk haklary, şeýle-de talyp haklary 20% ýokarlanar” – diýip, Rahmon aýtdy.
Respublikanyň ýolbaşçysy 2022-nji ýylyň ýanwar aýyndan harby we hukuk goraýjy edaralaryň işgärleriniň aýlyk haklaryny, degişlilikde 25% we 20% ýokarlandyrmagy teklip etdi. Prezidentiň aýtmagyna görä, 2022-nji ýylyň 1-nji iýulyndan ýetim çagalar üçin kömek pullarynyň mukdary 25% ýokarlanar.
Mundan başga-da, Emomali Rahmon iň pes zähmet hakyny ýokarlandyrmagy we ony 600 somoni (53 dollar) möçberde bellemegi teklip etdi.
Ýatlap geçsek, Täjigistanda soňky gezek 2021-nji ýylyň 1-nji sentýabrynda maýyp çagalar üçin kömek pullary ýokarlandy. Şeýle-de, şu seneden talyp haklary 30% ýokarlandyryldy.
