Ýaponiýanyň öňdebaryjy awtokonserni Toyota Motor bölekleriň ýetmezçilik etmegi sebäpli ýanwar aýynda Ýaponiýada ýerleşýän bäş zawodynda ýedi önümçilik hatarynyň işini togtatmaga mejbur bolar. Bu barada çeşmelere salgylanyp, “Nikkei” gazeti habar berdi. Muny TASS ýetirýär.
Bu togtatmanyň näçe gün dowam etjekdigi barada maglumat berilmeýär. Ýöne, gazetiň bellemegine görä, häzirki ýagdaý Toyota awtomobilleriniň hasap edilen önümçilik möçberiniň, takmynan, 20 müň birlik azalmagyna sebäp bolar.
Mundan öň, NHK teleýaýlymy Toyota-nyň Ýaponiýadaky iki kärhanasynyň işini 20-nji dekabrdan 22-nji dekabr aralygynda togtatjakdygyny habar berdi.
12-nji noýabrda Toyota 2021-nji ýylyň maý aýyndan bäri ilkinji gezek Ýaponiýadaky 14 zawodyň ählisiniň bölekler bilen üpjün etmek meselesiniň çözülendigi sebäpli adatdakysy ýaly işläp başlandygyny aýtdy. Dekabr aýynda awtokonserniň global önümçiliginiň 800 müň awtomobile barabar bolmagyna garaşyldy, bu bolsa dekabr aýy üçin rekorddyr.
