Täjigistanyň prezidenti Emomali Rahmon YHG-nyň ýurtlaryny söwda gurşawynda koronawirus çäklendirmelerini aýyrmaga çagyrdy. Bu barada ol Ykdysady Hyzmatdaşlyk Guramasynyň liderleriniň sammitinde aýtdy. Onuň aýtmagyna görä, çäklendirmeleriň ýatyrylmagy işewür gatnaşyklary işjeňleşdirmäge, şeýle-de ilatyň we transportyň erkin hereket etmegine mümkinçilik berer. Muny “MIR 24” ýetirýär.
Täjigistanyň baştutany sebitde energetika bazarynyň döredilmegini we CASA-1000 ýokary woltly elektrik geçiriji liniýasynyň gurulmagyny goldady. Ol Merkezi we Günorta Aziýany birleşdirip, sebit üçin energiýa köprüsine öwrüler.
Sammitiň çäklerinde ikitaraplaýyn duşuşyklar hem geçirildi. Eýranyň prezidenti bilen geçirilen gepleşiklerde iki ýurduň ulag ulgamlarynyň birleşmegi barada gürrüň edildi. Şeýlelik bilen, Duşanbe ýerüsti we demir ýollar arkaly Eýranyň portlaryna çykyp biler. Özbegistanyň lideri bilen geçirilen duşuşykda taraplar söwda-ykdysady hyzmatdaşlyk boýunça ikitaraplaýyn komissiýanyň işini işjeňleşdirmek kararyna geldiler. Türkmenistanyň Prezidenti bilen geçirilen söhbetdeşlikde ylym, medeniýet we saglygy goraýyş pudaklarynda gatnaşyklary ösdürmek barada gürrüň edildi.
Täjigistandan Pakistanyň portlaryna ulag geçelgeleriniň döredilmegi sebitleýin söwdany işjeňleşdirmäge mümkinçilik berer, bu Pakistanyň lideri bilen gürrüňdeşlikde esasy mowzuga öwrüldi. Türkiýäniň prezidenti Rejep Taýyp Ärdogan bilen geçirilen duşuşykda hem ykdysady hyzmatdaşlyk ara alnyp maslahatlaşyldy. Soňky bäş ýylda Täjigistan bilen Türkiýäniň arasyndaky söwda dolanyşygy iki milliard dollardan geçdi.
Iki ýurduň liderleri ekstremizmiň we terrorçylygyň global howplaryna garşy göreşde özara gatnaşyklary ara alyp maslahatlaşdylar.
