Italiýaly alymlar ilkinji bolup koronawirusyň «omikron» ştammynyň suratyny nusgada görkezmegi başardylar. Hünärmenler täze görnüşli COVID-19-yň suratyny görkezdiler we ony öň ýaýran «delta» ştammy bilen deňeşdirdiler diýip, RIA Nowosti Bambino Gesu rim we watikan hassahanasyna salgylanyp habar berýär.
Ýokanjyň has tapawutly aýratynlyklary suratda gyzyl bilen belgilenýär.
Surata laýyklykda, «omikronyň» 43 sany mutasiýasy (özgermesi) bar, «deltada» 18 mutasiýa bar. Esasy tapawutlyklar adamyň öýjükleri bilen baglanyşýan belok ulgamynda bar. Alymlaryň pikirine görä, munuň özi koronawirusyň adam organizmine uýgunlaşýandygyny görkezýär.
Şol bir wagtyň özünde, «omikronyň» COVID-19-yň öňki ştammyndan näderejede howpludygy barada kesgitli aýtmaga heniz ir. Ýokanjyň bu görnüşiniň immuniteti ýeňip biljekligi we kesele garşy sanjymyň netijeliligini peseldip biljekligi barada diňe jikme-jik seljerme geçirilenden soň aýdyp bolar diýip, Bütindünýä Saglygy Goraýyş Guramasynyň wekilleri jemgyýetçiligi howsala düşmezlige çagyrýar.
Muňa garamazdan, käbir hünärmenler eýýäm häzirden «omikrony» «deltadan» has howply hasaplaýarlar.
Koronawirusyň täze ştammy noýabryň başynda Günorta Afrika Respublikasynda ýüze çykaryldy. «Omikron» bilen kesellemäniň ilkinji ýagdaýlary Gonkongda, Belgiýada, Ysraýylda, Germaniýada, Italiýada, Niderlandlarda we Awstraliýada tapyldy.
Şunuň bilen baglylykda, dünýä ýurtlarynyň birnäçesi Günorta Afrika bilen howa gatnawlaryny togtatdy.
