Tesla-nyň esaslandyryjysy we baş direktory Ilon Mask kompaniýadaky paýnamalarynyň bir bölegini 1,1 mlrd dollardan gowrak baha satdy. Bu barada maliýe resminamalaryna salgylanyp, CNBC teleýaýlymy habar berýär. Muny www.rbc.ru ýetirýär.
Satylan paýnamalaryň sany 930 000 boldy. “The Financial Times” gazetiniň maglumatlary boýunça, bu onda bar bolan Tesla paýnamalarynyň, takmynan, 0,5%-ine deňdir. Häzir onda 170 mln töweregi paýnama bar.
Teleýaýlymyň habar berşi ýaly, Mask paýnamalaryň bir bölegini salgyt borçnamalaryny ýerine ýetirmek üçin satdy. Öň, telekeçi Tesla-nyň paýnamalarynyň 10%-ini satmalymy ýa-da ýokdugy barada pikir soraşma geçiripdi. “Soňky wagtlar durmuşa geçirilmedik girdejileriň – salgyt tölemekden gaçmagyň serişdesidigi barada köp aýdylýar, şonuň üçin Tesla paýnamalarymyň 10%-ini satmagy teklip edýärin” – diýip, ol ýazdy.
Mask nagt aýlyk ýa-da bonus almaýandygyny, ähli baýlygynyň paýnamalar görnüşindedigini, şonuň üçin salgytlary tölemegiň ýeke-täk usulynyň paýnamalary satmakdygyny düşündirdi. Ol pikir soraşmanyň netijesini neşir etdi, oňa laýyklykda, soraga gatnaşanlaryň köpüsi (57,9%) telekeçiniň Tesla-nyň paýnamalarynyň 10%-ini satmagyny goldady. Twitterdäki pikir soraşmadan soň, biržada Tesla-nyň paýnamalary iki günüň içinde bahasyndan 200 dollardan gowragy ýitirdi, şol sebäpli Maskyň aktiwleriniň baha hasaby 50 mlrd dollar peseldi.
