Türkmenistan we Özbegistan serhetýaka söwda zolagyny döreder. Bu ugurda Türkmenistanyň Prezidentiniň Daşkende saparynyň jemleri boýunça özbek-türkmen serhetýaka söwda zolagyny döretmek we onuň işini düzgünleşdirmek hakynda degişli Ylalaşyga gol çekildi. Bu barada Özbegistanyň Prezidentiniň Metbugat gullugynyň president.uz saýtynda habar berilýär.
Habarda bellenilişi ýaly, serhetýaka söwda zolagyny döretmek we onuň işini düzgünleşdirmek hakynda Ylalaşyk goňşy sebitlerde Söwda merkeziniň döredilmegini göz öňünde tutýar.
Duşuşygyň dowamynda: «Serhetýaka söwda zolagyny döretmek hakynda Ylalaşyk hem-de Özbegistanda we Türkmenistanda öndürilýän, iki ýurduň bazarlarynda-da isleg bildirilýän bäsdeşlige ukyply harytlaryň üçünji ýurtlardan importyny çalşyrmak boýunça gelnen ylalaşyk özara haryt dolanyşygynyň möçberini has-da artdyrmaga mümkinçilik berer» diýip, Özbegistanyň Prezidenti Şawkat Mirziýoýew belledi.
Ýeri gelende nygtasak, Türkmenistan bilen Özbegistanyň arasynda şu ýylyň başyndan bäri söwda dolanyşygynyň möçberi 25 göterim ýokarlanyp, 400 million dollardan geçdi. Iki dostlukly ýurt bu görkezijini görnetin artdyryp, geljek ýyllarda onuň möçberini 1 milliard dollara ýetirmegi göz öňünde tutýar.
