Prezident Gurbanguly Berdimuhamedow Türkmenistanyň halkynyň we Hökümetiniň adyndan hem-de hut öz adyndan Hytaý Halk Respublikasynyň Başlygy Si Szinpine we Hytaý Halk Respublikasynyň Döwlet Geňeşiniň Premýeri Li Kesýana hem-de dostlukly ýurduň halkyna Hytaý Halk Respublikasynyň jar edilen güni mynasybetli tüýs ýürekden gutlaglaryny we iň gowy arzuwlaryny ýollady.
Türkmen Lideri iberen hatlarynda Hytaýyň geçen döwrüň içinde öz halkynyň zähmetiniň we öňdengörüjilikli döwlet syýasatynyň netijesinde, ykdysadyýeti ösdürmekde, halkyň hal-ýagdaýyny gowulandyrmakda we ýurduň halkara abraýyny ýokarlandyrmakda uly üstünlikleri gazanmagy başarandygyny nygtap, hemmetaraplaýyn türkmen-hytaý gatnaşyklarynyň birek-birege hormat goýmak, deňlik hem-de özara bähbitli hyzmatdaşlyk ýörelgeleri esasynda ýurtlarymyzyň we halklarymyzyň bähbidine mundan beýläk-de ösdüriljekdigine hem-de pugtalandyryljakdygyna ynam bildirdi.
Gurbanguly Berdimuhamedow Hytaý Halk Respublikasynyň Başlygy Si Szinpine hem-de Hytaý Halk Respublikasynyň Döwlet Geňeşiniň Premýeri Li Kesýana tüýs ýürekden berk jan saglyk we bagtyýarlyk, dostlukly hytaý halkyna bolsa parahatçylyk, abadançylyk hem-de rowaçlyk arzuw etdi.
