Hytaýda bir milliarddan gowrak adama, başgaça aýdylanda, ýurduň ilatynyň 70 göterimine koronawirusa doly sanjym edildi. Bu barada Hytaý Halk Respublikasynyň Milli Saglyk Geňeşine salgylanyp, RIA Nowosti habar berdi.
Geňeş mundan başga-da, 12 ýaşdan 17 ýaş aralygyndaky 95 milliondan gowrak adama we 60 ýaşdan uly 200 million adama hem Hytaýda doly sanjym edilendigini belleýär. 15-nji sentýabrdaky ýagdaýa görä, ýurtda COVID-19-a garşy 2,16 milliard sanjym edildi.
Awgust aýynda dünýäde koronawirusa garşy edilen sanjymlaryň sany bäş milliarddan geçdi. Olaryň ýarysyna golaýy iki ýurda - Hytaýa we Hindistana degişli. Şol bir wagtyň özünde, bütin dünýäde näçe adamyň COVID-19-a garşy sanjymy doly alandygyny kesgitlemek mümkin däl.
