20-nji sentýabrda geçirilen Ministrler Kabinetiniň sanly ulgam arkaly giňişleýin mejlisinde Türkmenistanyň 2021-nji ýylda Ykdysady Hyzmatdaşlyk Guramasynda başlyklyk etmeginiň Konsepsiýasyndan gelip çykýan wezipelere laýyklykda, Türkmenistanda Ykdysady Hyzmatdaşlyk Guramasyna agza döwletleriň döwlet Baştutanlarynyň 15-nji duşuşygyny guramaçylykly we ýokary derejede geçirmek maksady bilen, Türkmenistanyň Prezidenti Karara gol çekdi.
Resminama bilen, degişli duşuşygy geçirmek boýunça Guramaçylyk topary döredildi we onuň düzümi tassyklanyldy. Resminama laýyklykda, Guramaçylyk toparyna şu duşuşygy guramaçylykly geçirmek boýunça utgaşdyryş işlerini, şeýle hem bu ugurda zerur çäreleri amala aşyrmagy üpjün etmek tabşyryldy. Şeýle hem Daşary işler ministrligine Ykdysady Hyzmatdaşlyk Guramasynyň Sekretariaty bilen bilelikde duşuşygyň maksatnamasyny we gün tertibini taýýarlamak boýunça degişli işleri geçirmek tabşyryldy.
Türkmenistanda geçirilmegi göz öňünde tutulýan bu çärelere taýýarlyk işleri barada wise-premýer, daşary işler ministri Raşid Meredow türkmen Liderine hasabat berdi. Döwlet Baştutany hasabaty diňläp, Bitarap Watanymyzyň daşary syýasatynda goňşy döwletler bilen ikitaraplaýyn we köptaraplaýyn esasda hem-de abraýly sebitara we halkara guramalar bilen netijeli gatnaşyklaryň ösdürilmegine möhüm ähmiýet berilýändigini nygtap, meýilleşdirilen çäreleriň ýokary guramaçylyk derejesiniň üpjün edilmeginiň zerurdygyny belledi.
