Amazon amerikan kompaniýasy hususy önümçiligi bolan Fire TV telewizor hataryny satuwa goýberýär. Bu barada kompaniýanyň metbugat relizinde aýdylýar diýip, TASS habar berýär.
Kompaniýanyň wekili Deniel Roşuň aýtmagyna görä, kompaniýa “telewizoryň mümkinçiliklerine täzeden garady we Alexa ses kömekçisiniň esasynda öz telewizoryny döretdi”. Ähli enjamlar uzak aralykda ses bilen dolandyrylýar we Smart TV funksiýasy bilen üpjün edilendir. Ekranlar 4K Ultra HD durulygyny göterýär. Telewizor hatary iki seriýany öz içine alýar: Omni we has arzan bolan 4-Series.
Fire TV Omni seriýasynyň telewizorlary ekranynyň diagonaly 43-den 75 dýuýma çenli bolan bäş modelde hödürlendi. Kiçi modeliň bahasy 409,99 dollar. Fire TV 4-Series-iň telewizorlarynyň bahasy 369,99 dollardan başlaýar.
Amazon dünýäde internet üsti bilen harytlary we hyzmatlary hödürleýän iň uly korporasiýadyr. Ol 1994-nji ýylda telekeçi Jeff Bezos tarapyndan döredildi. Häzirki wagtda ol 194 mlrd dollardan gowrak baýlygy bilen dünýäde iň baý adam hasaplanýar.
