Türkmenistanyň başlangyjy bilen Birleşen Milletler Guramasynyň Baş Assambleýasynyň 75-nji sessiýasynyň 102-nji plenar mejlisinde «Birleşen Milletler Guramasynyň we Ykdysady Hyzmatdaşlyk Guramasynyň arasynda hyzmatdaşlyk» atly Kararnama kabul edildi. Bu resminama BMG-niň agza ýurtlary tarapyndan biragyzdan goldanyldy. Bu barada TDIM-niň Metbugat gullugy habar berýär.
Mälim bolşy ýaly, Türkmenistanyň Ykdysady Hyzmatdaşlyk Guramasynda başlyklyk etmegiň çäklerinde, şu ýylyň 28-nji noýabrynda Aşgabatda bu guramanyň döwlet Baştutanlarynyň nobatdaky XV sammiti geçiriler. Şoňa görä-de, Türkmenistanyň YHG-da başlyklyk etmeginiň Konsepsiýasy işlenip taýýarlanyldy.
Ýeri gelende bellesek, Türkmenistanyň Prezidenti Gurbanguly Berdimuhamedow Ykdysady Hyzmatdaşlyk Guramasynyň göni wideoaragatnaşyk arkaly şu ýylyň 4-nji martynda geçirilen XIV sammitinde eden çykyşynda: «Biz öz başlyklygymyzy jogapkärli we belent wezipe hökmünde kabul edýäris. Onuň üstünlikli, netijeli we gatnaşyjylaryň bähbitlerine hyzmat etmegi üçin ähli tagallalary ederis» diýmek bilen, degişli Konsepsiýada Türkmenistanyň ileri tutýan ugurlaryny jikme-jik beýan etdi we öňde durýan anyk wezipeleri kesgitledi.
Türkmenistanyň BMG-niň Baş Assambleýasynyň golaýda açyljak 76-njy sessiýasynda ileri tutýan garaýyşlarynyň hatarynda-da «Birleşen Milletler Guramasynyň we Ykdysady Hyzmatdaşlyk Guramasynyň arasynda hyzmatdaşlyk» atly Kararnamanyň taslamasyny hödürländigini aýtmak gerek. Onda bellenilişi ýaly, Türkmenistan YHG-da başlyklyk etmeginiň barşynda ýokarda görkezilen Kararnamanyň hem-de ählumumy durnukly parahatçylyk we ösüş maksatlaryna ýetmegiň düzgünlerini ýerine ýetirmek maksady bilen, gurama agza ýurtlaryň BMG-niň edaralary bilen hyzmatdaşlygyny ösdürmegi maksat edinýär.
