Şu ýyl Ýewropada tomus soňky 30 ýylda iň yssy tomus boldy. Copernicus hemra monitoring maksatnamasynyň hasabatynda habar berlişi ýaly, 2021-nji ýylyň iýun aýyndan awgust aýy aralygynda ortaça temperatura 1991-nji ýyldan 2020-nji ýyl aralygyndaky tomus möwsümlerine garanyňda, Selsiý boýunça tas bir gradus ýokary boldy.
Hasabatda 11-nji awgustda Sisiliýada howanyň Selsiý boýunça 48,8 gradusa çenli gyzandygy bellenilýär. Bu görkeziji Bütindünýä meteorologiýa guramasy (BMG) tarapyndan tassyklanan ýagdaýynda, bu temperatura Ýewropada meteorologiki gözegçiligiň taryhynda iň ýokarysy bolar diýip, TASS belleýär.
Mundan başga-da, hünärmenler 2010-njy we 2018-nji ýyllardaky tomus möwsümleriniň ozal Ýewropada iň yssy diýlip hasaplanandygyny bellediler: şonda howanyň ortaça temperaturasy 2021-nji ýyldakydan Selsiý boýunça 0,1 gradus pes boldy.
2021-nji ýylyň awgust aýynda dünýädäki howa 1991-nji ýyldan 2020-nji ýyl aralygyndaky degişli döwür bilen deňeşdirilende, ortaça 0,3 gradus gyzdy. Şeýlelik bilen, geçen aý 2017-nji ýylyň awgust aýy bilen bilelikde global meteorologiki gözegçiligiň taryhyndaky tomsuň iň yssy soňky aýlarynyň hatarynda üçünji orny eýeledi. Meteorologlar awgust aýynda Ýewropanyň dürli ýerlerinde howanyň temperaturasynyň dürli bolandygyny belleýärler. Mysal üçin, Ortaýer deňzi ýurtlarynda ol rekord goýdy, gündogarda ortaçadan ýokary boldy, demirgazykda, tersine, pes boldy.
