Global Carbon Budget-iň maglumatlaryna görä, 2014-2024-nji ýyllar aralygynda global zyňyndylaryň ösüşi çürt-kesik bir gyradeň däl. Çalt senagatlaşýan Aziýa ýurtlary uglerod zyňyndylarynyň tiz artýandygyny görkezýärler, birnäçe ösen ýurtlar bolsa howany hapalamagyny ep-esli azaltdylar.
Hapalanmanyň ösüş depgini babatda Wýetnam öňdeligi eýeledi (+106%), ondan soň Indoneziýa (+63,1%) we Hindistan (+48,7%) gelýär. Şol bir wagtyň özünde, Beýik Britaniýada, Germaniýada we Ýaponiýada onuň has peselendigi anyklandy, olaryň her biri zyňyndylary 20%-den gowrak azaltdy.
Hytaý we Amerikanyň Birleşen Ştatlary esasy zyýanly gaz çykaryjy ýurtlar bolmagynda galýarlar, olar dünýädäki zyýanly gazlaryň ep-esli bölegini çykarýarlar. Hytaýyň uglerod zyňyndylary 23,2% artdy (2,3 milliard tonna artdy), Birleşen Ştatlar bolsa kömürden ýüz öwürmek arkaly zyýanly gazlaryň zyňyndylaryny 11,3% azaltdy we 4,9 milliard tonna düşürdi.
Hindistan zyýanly gazlary köp mukdarda çykarýan ýurtlaryň üçünjisi bolmagynda galýar, ýöne arassa energiýany giň gerim bilen ösdürýändigi sebäpli 2025-nji ýylda zyňyndylaryň çykyş depgininiň rekord derejede peselendigi - bary-ýogy 0,7% bolandygy hasaba alyndy.
Bilermenler planetanyň geljekki howa üýtgeşmeleriniň ösüp gelýän bazarlaryň pes uglerodly energiýa çeşmelerine geçmek ukybyna bagly boljakdygyny nygtaýarlar. Häzirki wagtda Beýik Britaniýada (-28,7%) we Germaniýada (-27,8%) zyňyndylaryň azaldylmagy gaýtadan dikeldilýän energiýa çeşmelerini işjeň ornaşdyrmak arkaly gazanylýar, Aziýada bolsa energiýa bolan isleg çalt depginde artmagyny dowam etdirýär.
