Türkiýäniň Prezidenti Rejep Taýyp Ärdogan "Dünýäni has adalatly edip bolar" atly kitap ýazdy. Bu kitabyň satuwy ýurtda 6-njy sentýabrda başlady. Muny Anadolu agentligine salgylanyp, lenta.ru habar berdi.
Kitapda türk Lideri global syýasatyň meselelerine, hususan-da adalatsyzlyga, migrasiýa krizisine, halkara terrorçylygyna we yslamofobiýa, diskriminasiýa we goşa standartlara ünsi çekýär. Onuň pikiriçe, BMG-niň Howpsuzlyk Geňeşi düýpli üýtgeşmelere mätäç. Şeýle hem ol Türkiýäniň maksadynyň, "kim güýçli bolsa şonuňky dogry däl-de, tersine, kimiňki dogry bolsa, güýç şonuň tarapynda bolýan ulgamy döretmekden" ybaratdygyny nygtaýar.
Prezidentiň kitabynda global adalaty ýola goýmak boýunça jogapkär edaralaryň hereketlerine syn berlip geçilýär, geçmişiň talaplaryna laýyklykda döredilen edaralar arkaly häzirki zaman meselelerini çözmegiň mümkin däldigi aýdylýar. Şunuň bilen baglylykda: "Adalatly dünýä ynam we umyt döredýän global tertip zerur" diýip, syýasatçy öz kitabynda belleýär.
