5-nji sentýabrda sebitiň ýurtlarynyň Owganystan boýunça ýörite wekilleriniň göni wideoaragatnaşyk arkaly duşuşygy geçirildi. Goňşy ýurtdaky ýagdaýlar onuň esasy temasy boldy. Mejlisde türkmen tarapyna Türkmenistanyň daşary işler ministriniň orunbasary Wepa Hajiýew wekilçilik etdi. Bu barada mfa.gov.tm internet saýty habar berýär.
Eýranyň, Hytaýyň, Pakistanyň, Täjigistanyň we Özbegistanyň Owganystan boýunça ýörite wekilleriniň gatnaşmagynda geçirilen duşuşykda Owganystandaky häzirki ýagdaýlar hem-de halkara bileleşigiň bu ugurdaky tagallalary, şol sanda sebitiň ýurtlarynyň owgan ugry boýunça hyzmatdaşlygynyň giňeldilmegi dogrusynda jikme-jik pikir alşyldy.
Türkmenistanyň daşary işler ministriniň orunbasary durmuş-ykdysady ugur boýunça, şol sanda energetika, ulag we kommunikasiýalar ulgamlarynda iri göwrümli taslamalaryň durmuşa geçirilmegi arkaly türkmen tarapynyň Owganystanda parahatçylygyň ýola goýulmagyna saldamly goşant goşýandygyny nygtady.
