Türkmenistanyň Maliýe we ykdysadyýet ministrligi Bütindünýä bankynyň toparynyň düzümine girýän Halkara täzeleniş we ösüş banky bilen «COVID-19-a garşy göreşmek» taslamasy boýunça ABŞ-nyň 20 mln dollaryna barabar bolan karz ylalaşygyna gol çekdi.
Gol çekmek dabarasy ýurdumyzyň maliýe-ykdysadyýet toplumynyň binasynda maliýe we ykdysadyýet ministri M.Serdarowyň Bütindünýä bankynyň Türkmenistanyň hemişelik wekili Ýan-Peter Olterson hem-de BB-niň Merkezi Aziýa boýunça sebit direktory Tatýana Proskurýakowa bilen geçiren duşuşygynyň çäginde geçirildi.
Duşuşygyň çäginde taraplar Türkmenistan bilen Bütindünýä bankynyň arasynda dürli ugurlarda, şol sanda koronawirus pandemiýasyna garşy göreşmekde özara gatnaşyklary mundan beýläk hem pugtalandyrmagyň ýollaryny maslahatlaşdylar.
Prezident Gurbanguly Berdimuhamedowyň tabşyrygyna laýyklykda, Bütindünýä bankyndan alynjak serişdeler — ABŞ-nyň 20 mln dollary Türkmenistanda koronawirusy anyklamaga we öňüni almaga, munuň üçin zerur bolan enjamlary we lukmançylyk serişdelerini satyn almaga gönükdiriler.
