Tokioda geçiriljek Olimpiýa oýunlarynyň ilkinji rekordy: Beýik Britaniýanyň ýygyndysyna girýän skeýtbordçy Skaý Braun oýunlaryň taryhynda iň ýaş türgen boldy. Golaýda ol resmi ýagdaýda Beýik Britaniýanyň Olimpiýa ýygyndysynyň düzümine girdi. Bu barada «МИР 24» teleýaýlymynyň sport synçysy Dmitriý Kalugin habar berdi.
«Bu şatlykly ýagdaý. Men Olimpiada gidýärin. Dostlarym hem meniň üçin şatlanýarlar. Men bolsa örän bagtly» diýip, türgen gyz aýdýar.
Haçan-da skeýtbordçylaryň ýaryşlary başlananda, Skaýyň ýaşy 13 ýaş 11 gün bolar. Bu Beýik Britaniýa üçin rekord dereje. Entek çagadygyna garamazdan, Skaý öz türgenleşýän sport görnüşi boýunça iň ökdeleriň biri. Ol 8 ýaşynda ýaryşlarda çykyş edip başlady, häzir bolsa sanawda üçünji orny eýeleýär. Ol Olimpiada öňdebaryjylaryň esasy sanawynda gatnaşýar.
«Olimpiýa oýunlarynda bolmagyň özi eýýäm ýakymly. Men bolsa ol ýerde ýaryşaryn. Elbetde, medal almagy arzuw edýärin. Men iň kiçijek türgen bolaryn, ýöne şonda-da hormat münberiniň ýokary basgançagyna çykmaga ymtylaryn. Men dünýäde hiç kimiň entek edip görkezmedik hereketlerini görkezerin» diýip, Skaý söz berýär.
Sähel wagt mundan ozal hem Skaý Braunyň Tokio Olimpiadasyna gatnaşjakdygy uly sorag astyndady. Çünki türgenleşik wagtynda ol rampanyň çäginden çykyp, beýiklikden betondan bolan ýere ýykyldy we beýni sarsgynyny alyp, elini döwdürdi. Ene-atasy gyzynyň sportuň beýle howply görnüşi bilen meşgullanmakdan el çekmegini gazanmaga synanyşdylar, ýöne olaryňky başa barmady.
Skaý Braun bütin dünýäde uly meşhurlykdan peýdalanýar. Onuň eýýäm iri sport brendleri bilen düýpli ylalaşyklary bar. Onuň bilen adybir gurjak bazara çykaryldy, sosial torlardaky abunaçylarynyň sany bolsa milliona golaýlaýar. Braunyň kakasy britaniýaly, ejesi bolsa ýapon. Şoňa görä-de, türgen gyzda haýsy ýurduň adyndan çykyş etjekdigini saýlamaga mümkinçilik boldy. Sport bilen meşgullanmaga ähli amatly şertleriň döredilendigi üçin ol Beýik Britaniýany saýlady.
Häzir hemmeler Skaý Braun hakynda gürrüň edýär, ýöne Tokio Olimpiadasynda oňa mynasyp bäsdeş hem garaşýar. Braziliýaly türgen Raýssa Leal Skaý bilen ýaşytdaş diýen ýaly. 13 ýaşly braziliýaly türgen Raýssa hem öz ýurdunda eýýäm meşhurlaryň hatarynda. Bu tomusda bolsa ol Skaý Braun bilen bilelikde Olimpiýa oýunlaryna gatnaşar.
