GDA-nyň Elektroenergetika geňeşiniň (EEG) wideokonferensiýa görnüşinde geçirilen adatdan daşary mejlisinde Russiýa Federasiýasynyň energetika ministri Nikolaý Grigorýewiç Şulginow EEG-niň prezidenti, Türkmenistanyň energetika ministri Çarymyrat Purçekow wise-prezidenti wezipesine saýlandy. Bu barada turkmenistan.gov.tm habar berýär.
Duşuşyga Türkmenistanyň, Azerbaýjanyň, Ermenistanyň, Belarusyň, Gazagystanyň, Gyrgyzystanyň, Moldowanyň, Russiýa Federasiýasynyň, Täjigistanyň we Özbegistanyň ugurdaş ministrlikleriniň we milli elektroenergetika kompaniýalarynyň ýolbaşçylary gatnaşdy.
Duşuşykda şeýle hem elektroenergetika pudagyndaky GDA agza ýurtlaryň özara gatnaşygynyň we hyzmatdaşlygynyň Strategiýasynyň durmuşa geçirilişi ara alnyp maslahatlaşyldy hem-de GDA-nyň Elektroenergetika geňeşiniň ýanyndaky Utgaşdyryjy geňeş baradaky Düzgünnama tassyklanyldy. Kabul edilen kararlaryň netijesinde Geňeşiň wezipeleri, şeýle hem oňa berlen hukuklar giňeldildi.
Şeýle hem GDA agza ýurtlaryň elektroenergetika pudagynyň 2020-2021-nji ýylyň güýz-gyş möwsüminde alyp baran işleriniň netijeleri baradaky maglumatlar hem-de 2020-nji ýyl üçin EEG-niň hasabaty diňlenildi.
GDA-nyň EEG Ýerine ýetiriji komitete «21-nji asyryň täzelenip dikeldilýän energiýa syýasaty boýunça bütindünýä tory» ("REN 21") halkara kommersiýa däl birleşigine agzalygy goşulmagyny guramagy tabşyrdy.
Duşuşykda şeýle hem Ýerine ýetiriji komitete 2021-nji ýylyň 1-nji awgustyna çenli GDA-nyň EEG-niň 59-njy mejlisiniň senesini we ýerini ylalaşmagy tabşyrmak barada karar kabul edildi.
