Berkshire Hathaway amerikan holding kompaniýasynyň ýolbaşçysy Uorren Baffet Bill bilen Melinda Geýtsiň haýyr-sahawat gaznasynyň howandary wezipesinden gitdi. Bu barada Baffetiň beýanynda aýdylýar diýip, TASS habar berýär.
Baffet köp ýyllaryň dowamynda eýýäm uzak wagt bäri dostlukly gatnaşyklary saklaýan Geýtsleriň gaznasynyň howandary bolandygyny belledi. Şol bir wagtyň özünde ol munuň serişdelerini berýän ýeke-täk gaznadygyny hem sözüniň üstüne goşdy.
“Indi men bu wezipeden, şeýle-de Berkshire-den başga ähli kompaniýalaryň ýolbaşçylygyndaky wezipelerden gidýärin” – diýip, Baffet belledi. Gaznanyň baş müdiri Mark Sýuzman onuň gelen netijesini doly goldady. “Meniň maksadym gaznanyň maksatlary bilen 100% gabat gelýär, bu maksatlara ýetmek üçin meniň fiziki barlygym hökman däl” – diýip, Baffet aýdýar.
2000-nji ýyldan bäri Bill bilen Melinda Geýts, takmynan, 50 mln dollara eýeçilik edýän haýyr-sahawat gaznasyna ýolbaşçylyk edýärler. Guramanyň esasy iş ugurlarynyň hataryna ösüp barýan ýurtlarda howply keseller bilen göreşmek, ABŞ-nyň saglygy goraýyş we bilim pudagyndaky maksatnamalar girýär. Şu ýylyň maý aýynda Bill bilen Melinda Geýtsiň aýrylyşandygy belli boldy. Ýöne muňa garamazdan, olar haýyr-sahawat gaznasynda bilelikde işlemegi dowam etdirýärler.
1965-nji ýylda Baffet bankrot bolmaga ýakyn bolan Berkshire Hathaway dokma kärhanasynyň gözegçilik paýnamasyny satyn aldy we ony dürli ugurlarda işleýän kompaniýalaryň serişdelerini dolandyrýan holdinge öwürdi. Geçen ýylyň awgust aýynda telekeçi we haýyr-sahawatçy Baffet 90 ýaşady.
