Amazon kompaniýasyny esaslandyryjy Jeff Bezos bilen kosmosa uçmak üçin orun 28 million dollara satyldy. Auksion Blue Origin kosmos guramasy tarapyndan geçirildi diýip, Day.Az habar berýär.
“107 belgili adama 28 million dollara satyldy” – diýip, auksionçy auksionyň ahyrynda yglan etdi.
Auksiona 159 ýurtdan jemi 7,6 müň töweregi adam gatnaşdy. Häzirki wagtda Bezos we onuň dogany bilen orbita uçmak mümkinçiligine kimiň eýe bolandygy mälim edilmeýär. New Shepard gämisinde kosmosa uçmak mümkinçiligini alan adamyň ady birnäçe hepdeden belli bolar diýlip çak edilýär. Şeýle-de, tiz wagtdan ekipažyň “dördünji we iň soňky” agzasynyň kim boljakdygy mälim ediler diýip, Blue Origin belledi.
Blue Origin New Shepard gämisiniň 15 synag uçuşyny geçirdi. Olaryň ählisi dolandyryjysyz režimde geçdi. Aprel aýynyň ortalarynda geçen iň soňky synag hem ekipažsyz geçdi, ýöne başlamazdan öň geljekki dolandyrylýan uçuşyň “taýýarlygy” geçirildi.
