Dünýäniň iň baý 500 adamsynyň umumy baýlygy 2025-nji ýylyň ahyryna çenli rekord derejede 2,2 trillion dollar artyp, 11,9 trillion dollara ýetdi. Bu barada milliarderleriň indeksine salgylanýan "Bloomberg" agentligi habar berýär. Bu ösüş dünýä bazarlaryndaky — paýnamalardan başlap, kriptowalýutalara we gymmat bahaly metallara çenli ähli ugurlardaky ýokary göteriliş bilen baglanyşyklydyr.
Umumy ösüşiň takmynan dörtden bir bölegi diňe sekiz adama degişli boldy. Olaryň arasynda "Oracle" kompaniýasynyň esaslandyryjysy we iň uly paýdary Larri Ellison, "Tesla" kompaniýasynyň ýolbaşçysy Ilon Mask, "Google" kompaniýasynyň esaslandyryjysy Larri Peýj we "Amazon" kompaniýasynyň esaslandyryjysy Jeff Bezos bar. Bloomberg agentligi bu milliarderleriň umumy ösüşdäki paýynyň geçen ýyldakydan (43%) pes bolandygyny belleýär.
Agentlik ýylyň dowamynda baýlygyny iň köp artdyran şahsyýetleri aşakdakylar diýip görkezýär:
- Larri Ellison: baýlygy $249,8 mlrd, ýyllyk girdejisi — $57,7 mlrd;
- Ilon Mask: baýlygy $622,7 mlrd, ýyllyk girdejisi — $190,3 mlrd;
- Jina Raýnhart: (awstraliýaly işewür zenan) baýlygy $37,7 mlrd, ýyllyk girdejisi — $12,6 mlrd;
- Donald Tramp we onuň maşgalasy: baýlygy $6,8 mlrd, ýyllyk girdejisi — $282 mln.
Ösüşiň goşmaça hereketlendiriji güýji emeli aň (AI) tehnologiýalaryna bolan gyzyklanma boldy, bu bolsa iri tehnologiýa kompaniýalarynyň paýnamalarynyň gymmatlamagyna getirdi. Maýa artyşynyň iň uly bölegi sebitler boýunça şeýle paýlandy:
- Demirgazyk Amerika (ABŞ we Kanada): $1,1 trillion
- Aziýa we Okeaniýa: $550,7 milliard
- Ýewropa: $386,5 milliard
