Germaniýada 10-njy iýundan sanly sanjymlaşdyrma sertifikaty hereket edip başlady. Bu barada žurnalistlere Germaniýa Federatiw Respublikasynyň Saglygy goraýyş ministrliginiň wekili habar berdi diýip, TASS ýetirýär.
«Sanjymlaşdyrmanyň sanly pasporty indi yzygiderli ýaýradylar we mobil goşundy ýaly elýeterli bolar» diýip, GFR-iň Saglygy goraýyş ministrliginiň wekili aýdýar.
Ilkibaşda Germaniýa sanly sanjym pasportlaryny 14-nji iýundan girizmekligi meýilleşdiripdi. Doly sanjym alan ýaşaýjylar bu mobil goşundyny restoranlara, medeni we beýleki çärelere baranlarynda ulanyp bilerler.
Germaniýada koronawirusa garşy sanjymlaşdyrma işi dekabryň ahyrynda başlandy. Ilkinji bolup uly ýaşly raýatlar, lukmanlar, lukmançylyk ulgamyna degişli işgärler we beýleki möhüm durmuş maksatly işgärler sanjym aldy. Häzirki wagta çenli nemesleriň 38,6 milliony, ýagny ilatyň 46,5 göterimi birinji gezek sanjym etdirdi. 19 milliony bolsa dolulygyna sanjymdan geçdi. Sanjymlaşdyrma üçin BioNTech we Pfizer konsorsiumy, Moderna, AstraZeneca hem-de Johnson & Johnson (J&J) kompaniýalary tarapyndan öndürilen sanjymlar ulanylýar.
