Ysraýyl döwleti taryhda ilkinji gezek BMG-niň Ykdysady we Durmuş geňeşine agza hökmünde saýlandy. Bu barada newsru.co.il saýtyna salgylanyp, Trend agentligi maglumat berýär.
Birleşen Milletler Guramasynyň Ykdysady we Durmuş geňeşi (EKOSOS) bu guramanyň esasy düzümleriniň biri bolup, Milletler Bileleşiginiň ykdysady we durmuş meseleleri boýunça iş alyp barýan ýöriteleşdirilen edaralarynyň 15-siniň, funksional komissiýalarynyň 9-synyň we sebitleýin komissiýalarynyň 5-siniň işini utgaşdyrmaga jogapkärdir. Bu geňeşiň agzalygyna BMG-niň düzümindäki 193 döwletiň arasyndan her iki ýyldan bir gezek saýlanýan 54 ýurt girýär. Ysraýyl döwleti bolsa görlüp-eşidilmedik goldaw alyp, 154 ýurduň ses bermegini gazandy.
Ýeri gelende bellesek, BMG-niň Baş Assambleýasynyň 72-nji sessiýasynyň 96-njy mejlisinde Türkmenistan BMG-niň Ykdysady we Durmuş geňeşiniň 2019 — 2021-nji ýyllar üçin agzalygyna saýlanyp, häzir bu wezipäni abraý bilen ýerine ýetirýär. Türkmenistan ilkinji gezek 2013 — 2015-nji ýyllarda hem BMG-niň bu esasy düzüminiň agzalygyna kabul edilipdi.
