«Ýewropa ýetginjeklere sanjym etmäge girişýär. Maý aýynyň ahyrynda Derman serişdeleriniň Ýewropa agentligi tarapyndan 12 ýaşdan başlap Pfizer/BioNTech sanjymyny ulanmaga rugsat berildi. 1-nji iýundan bolsa Italiýada we Rumyniýada ýetginjeklere sanjym edilip başlady» — diýip, euronews.com habar berýär.
Fransiýada ýetginjekler ene-atalarynyň rugsady bilen 15-nji iýundan başlap sanjym alyp bilerler — diýip, ýurduň Prezidenti Emmanuel Makron aýtdy. Ýurduň saglygy goraýyş ministri Oliwýe Weranyň sözlerine görä, kämillik ýaşyna ýetmediklere sanjym etmek hökmany däl, ýöne ol toparlaýyn immuniteti kemala getirmäge ýardam edip biler. Häzir Fransiýada koronawirusa garşy sanjymlar meşhurlyga eýe bolýar. Fransuzlaryň uly ýaşlylarynyň her ikinjisi eýýäm sanjymyň birinji dozasyny kabul etdi.
Ýöne ýetginjekleri sanjym etmegiň zerurlygy meselesi köp ýurtlarda, şol sanda Rumyniýada şübhelenme döredýär. «Meniň pikirimçe, koronawirus ýokanjy çagalar üçin o diýen howply däl. Şonuň üçin-de olara sanjym etmek möhüm däl. Ene-atalar edil ululara bolşy ýaly, sanjymlaryň çagalar üçin hem howpsuzdygyny bilmekleri zerur. 12-15 ýaş aralygyndaky ýetginjekler üçin sanjymlaryň netijeliligi — 100 göterim. Ýönekeýleşdirip aýtsak, sanjymdan soň olar kesellemez» — diýip, lukman Sandra Aleksiu düşündirýär.
