Suwasty dünýäni synlamaklyk adamlaryň saglygyna we maşgaladaky özara gatnaşyklara oňaýly täsir edýär. Bu barada «Izwestiýa» gazetine salgylanyp, «Mir24» habar berýär.
Psihologiýa ylymlarynyň kandidaty, dosent Alekseý Melehiniň aýtmagyna görä, operasiýadan ýa-da lukmanyň ýanyna barylmazdan öň akwariuma seretmek gorkudan we howsalalykdan baş alyp çykmaga kömek edip biler.
Balyklary synlamak demensiýaly hassalara — newrologik we psihologik alamatlary bolan adamlarda duýgulary gowulandyrmaga, gahar-gazaby azaltmaga we käbir bozulmalaryň öňüni almaga mümkinçilik berýär. Öýde akwariumyň bolmagy mekdep okuwçylarynda we talyplarda özüne bolan ynamy döredip, howsalalygy ýeňip geçmäge hem-de mugallymlar bilen özüni rahat alyp barmaga kömek edýär. Şeýle hem balyklar psihiki taýdan rahatlyk berip, gatnaşyklary berkitmäge, ýekelikden halas bolmaga we dartgynlylygyň alamatlaryny ýeňip geçmäge ýardam berýär.
Psihoanalitigiň bellemegine görä, jandarlaryň islendigi bilen «gürrüňdeş bolmak» saglyga oňaýly täsir edýär: arterial gan basyş peselýär, ýürek-damar keselleriň döremek töwekgelçiligi we ölüm hadysasy azalýar, çünki öý haýwanlarynyň eýeleri öz söýgüli jandarlary üçin jogapkärçiligi duýmak bilen, öz geljegi hakynda aladalanyp başlaýar.
