Louis Vuitton Moet Hennessy toparynyň prezidenti Bernar Arno «Forbes» žurnalynyň milliarderler sanawynda birinji orna geçdi diýip, RIA Nowosti habar berýär.
Soňky bir günüň dowamynda Arnonyň baýlygy 710 mln artyp, 186,3 mlrd dollara ýetdi. Bu oňa Amazon kompaniýasyny esaslandyryjy Jeff Bezosdan öňe geçmäge mümkinçilik berdi. Şeýlelik bilen, Bezos 186 mlrd dollar bilen ikinji orna düşdi. Sanawda üçünji orny 147,3 mlrd dollar baýlygy bilen Tesla we SpaceX kompaniýalaryny esaslandyryjy Ilon Mask eýeleýär.
2020-nji ýylyň mart aýyndan bäri Arnonyň baýlygy 110 mlrd dollardan gowrak artdy. Muňa koronawirus pandemiýasyna garamazdan, LVMH-iň ýokary görkezijileri görkezmegi ýardam etdi. Şu ýylyň birinji çärýeginde holding 14 mlrd ýewro girdeji gazandy, bu 2020-nji ýylyň degişli döwründäki görkezijiden 32% ýokarydyr.
LVMH – Louis Vuitton, Givenchy, Guerlain, Kenzo, Moet & Chandon, Hennessy ýaly söwda belgileri bilen bezeg harytlaryny öndüriji. Onuň ştab-kwartirasy Parižde ýerleşýär.
