Stratolaunch aerokosmiki kompaniýasy ilkinji uçuşdan iki ýyl soň, dünýädäki iň uly uçaryň ikinji synag uçuşyny geçirdi. Uçar Kaliforniýadaky Mohawe aerokosmiki portundan asmana galdy. Ol üç sagadyň dowamynda dürli uçuş hereketlerini amala aşyrdy, şondan soň ýere üstünlikli gondy. Bu barada lenta.ru habar berýär.
Arap we pars mifologiýasyndaky ägirt guşuň hormatyna atlandyrylan iň uly Roc uçary ilkinji gezek 2019-njy ýylyň aprel aýynda uçupdy. Şondan soň birnäçe ýyllap uçmady, esaslandyryjynyň ýogalmagy sebäpli, kompaniýa kyn ýagdaýa düşdi we taslamany togtatdy.
Iki fýuzelýažly uçaryň ganatynyň gerimi 117,3 metr bolup, bu ony dünýädäki iň uzyn ganatly uçara öwürýär. Deňeşdirmek üçin getirsek, Virgin Orbit tarapyndan kosmos uçuşlary üçin ulanylýan kämilleşdirilen Boeing 747 uçarynyň ganatynyň gerimi 64,3 metre deňdir. Ganatynyň uzynlygy boýunça ozalky rekord eýesi 1947-nji ýylyň Spruce Goose uçary bolupdy. Onuň ganatynyň uçlarynyň arasyndaky aralyk 97,5 metre ýetýärdi.
Roc-yň agramy 226,8 tonna. Synag uçuşynyň dowamynda ol iň ýokary 304 km/sag tizlige ýetip, 5182 metr belentlige galdy. Roc 10 km belentlikde uçmak üçin niýetlenýär. Ol howadan kosmiki enjamlary orbita uçurmakda peýdaly bolup biler.
