Xiaomi-niň täze flagmany bolan Mi 11-i öňünden sargyt etmek mümkinçiligi 28-nji dekabrda peýda bolupdy. Şonda-da ulanyjylar smartfonyň bar bolan partiýasynyň ählisini bary-ýogy 30 sekuntda satyn aldylar diýip, tech.sm.news habar berýär.
Häzirki wagtda flagman ahyrsoňy bölek satuwda satylyp başlandy we onuň dükanlarda ilkinji satuwlarynyň netijeleri belli boldy. Smartfony satyn almak üçin bir milliona golaý adamyň nobata durandygy aýdylýar.
"Xiaomi" toparynyň wise-prezidenti Zeng Sýueçžun öz gezeginde satuwyň üstünlikli bolandygyny tassyklady. Ol kompaniýanyň bary-ýogy bäş minutda 350 müň sany Mi 11 smartfonyny satandygyny belleýär.
Şol bir wagtyň özünde, satuwdan alnan girdeji gaty täsirli boldy. Ol, takmynan, 230 million dollara ýa-da 1,5 milliard ýuana deň boldy.
