Pandemiýa başlany bäri dünýäde saglygy goraýyş pudagynda 50 sany täze milliarder peýda boldy diýip, Forbes-e salgylanyp, rbc.ru ýetirýär. Olaryň baýlygy sanjym taýýarlaýan ýa-da lukmançylyk enjamlary bilen üpjün edýän kompaniýalaryň paýnama bahasynyň ösmegi netijesinde ýokarlandy.
Neşiriň maglumatlaryna görä, pandemiýa döwründe baýan täze milliarderleriň arasynda şular bar:
Ugur Şahin – BioNtech nemes biotehnologik kompaniýasynyň baş müdiri. Pfizer amerikan kompaniýasy bilen hyzmatdaşlykda ol 95% netije görkezen koronawirusa garşy sanjymy taýýarlady. Ýylyň başyndan bäri kompaniýanyň paýnamalary 160% ýokarlandy. Şonuň netijesinde Şahiniň baýlygy 4,2 milliard dollara ýetdi.
Stefan Bansel – Moderna amerikan kompaniýasynyň ýolbaşçysy. Forbes Banseliň baýlygyny 4,1 milliard dollar bilen bahalandyrýar. Ýylyň başyndan bäri Moderna-nyň paýnama bahasy 550%-den gowrak ýokarlandy.
Hu Kun – Hytaýyň lukmançylyk enjamlaryny öndürýän Contec Medical Systems kompaniýasynyň ýolbaşçysy. Onuň baýlygy 3,9 milliard dollar bilen bahalandyrylýar.
Karl Hansen – Kanadanyň AbCellera kompaniýasynyň ýolbaşçysy. Neşiriň hasabyna görä, onuň baýlygy 2,9 milliard dollara barabar.
Serjio Stewanato – dünýäde ululygy boýunça ikinji orunda durýan aýna çüýşelerini öndüriji italýan kompaniýasy Stevanato Group-yň ýolbaşçysy. Neşir onuň baýlygyny 1,8 milliard dollar diýip belleýär.
2020-nji ýylyň jemi boýunça dünýäde 2200-den gowrak milliarder 1,9 trillion dollar baýadylar diýip, Forbes habar berýär. Ähli milliarderleriň baýlygy jemi 11,4 trillion dollar bilen bahalandyrylýar.
