Jeýms Bond hakyndaky “Ölmegiň wagty däl” atly täze filmiň premýerasy 2021-nji ýyla yza süýşürildi. Bu barada filmiň resmi twitter sahypasyna salgylanyp, rbc.ru habar berdi.
Habarda baş keşbi Deniel Kreýg janlandyrýan filmiň 2021-nji ýylyň 2-nji aprelinde - başda meýilleşdirilendäkisinden bir ýyl soň çykjakdygy aýdylýar. Bondiananyň nobatdaky filminiň premýerasy şu ýylyň mart aýynda koronawirus pandemiýasy we kinoteatrlaryň ýapylmagy sebäpli yza süýşürilmeli bolupdy. “Ölmegiň wagty däl” filminiň Angliýada 2020-nji ýylyň 12-nji noýabrynda we Demirgazyk Amerikada 20-nji noýabrda ekranlara çykmagy meýilleşdirilipdi. Şeýle hem film 19-njy noýabrda Russiýada prokata çykmalydy.
Bondiananyň täze bölümine Keri Fukunaga režissýorlyk etdi. Filmde Rami Malek, Lea Seýdu we Laşana Linç dagylar hem çykyş edýär.
